【Day 59】
今日不禁要講一句：It is too wonderful！
一早起身同個比利時仔吹左兩句，佢話要爬羅馬尼亞既山，挑戰自己咁話，之後say goodbye時俾左個比利時goodbye kiss我，但佢D鬍鬚好"吉"！
之後一直都十五十六到底去Bran Castle好定Sinaia。前者係著名既吸血鬼城堡，所有遊客都會慕名前往一覽吸血鬼王子既城堡；後都係當地人極力推介既精緻城堡，仲話靚過Bran多多聲。
左諗右諗後，雖然自己有睇開Vampire Diaries同Twilight，但始終喜歡去遊客無咁多既地方，加上好似話Bran Castle入面無咩特別，所以都係決定去Sinaia。
我既決定係無錯！
不過去到之後完全唔知點行去個城堡度，遊蕩左一陣後見到有對情侶就捉左佢地問。點知原來佢地都係去城堡！
女仔係來自羅馬尼亞，男就係西班牙人，愛情真係無分國界！哈哈！
佢地識點行去，咁當然之後就一齊行啦！幫下佢地拍寫真，吹下大家既背景，交換下面既書咁。終於入到去個城堡入面，真係好靚！！！
每個位都做得好細緻，你會唔明點解當時既人手工可以好到咁。行完後大家就分道揚鑣，點知行行下突然落大雨。
正所謂大樹好遮蔭，藏左係大樹下面諗等到細雨小小再跑去火車站搭火車走。然後有個念頭就係唔知行過有遮或者揸車經過見到我呢個姿勢奇怪，攬住部相機停係半路既人，會唔會伸出緩手遮我或者車我。
正當我仲沉思緊既時候，突然有格車停低，開窗，有個頭伸出來，大叫：Do you need help？
Oh My God！Of course！
之後就一枝箭咁衝左上車，再順利到達火車站！！呢個世界好人多的是！
番到old town後，話說琴晚同個兩位妹妹約好今晚再見，而今朝先同佢地講大概幾點邊度等，但因為趕時間關係，無等佢地覆就出左去。
不過因為我約夜晚八點，對於未成年少女來講都算夜，所以我根本唔知佢地ok唔ok，個時心諗：好！等到九點就走！點知等左兩個字左右，熟悉既面孔終於出現係眼前！
不見不散？哈哈，可能啦。
原來佢地都唔肯定係咪真係見到我，個種感覺好奇妙。係無電話，唔確定既情況下為一個小小既承諾而等大家，我諗即使係香港，同朋友去街都做唔到咁……so sad………
Anyway，佢地已經一早構思好哂點樣同我過最後今晚，因為聽日我就會去第二個城市。佢地最後邀請左我去其中一個人既屋企，食下小點，飲下汽水，吹下水，咁就一晚。
呢種感覺好特別，雖然大家唔係識左好耐，而且我都算大過佢地好幾年，但就有種老朋友既感覺。
一見如故？唔知啦。至少，今晚我飲飽食醉，係沉醉於歡笑聲中。
唔，或者有日我會再重遊，為既唔係個度既景，而係遇上既人。
Blog：http://backpackersopoor.blogspot.hk/
U Blog: http://blog.ulifestyle.com.hk/blogger/backpackersopoor/
Search